Mae Plant yng Nghymru yn cynnal ystod o waith i ddylanwadu’n uniongyrchol ar ddatblygiad polisïau.

Fforymau a rhwydweithiau - Mae Plant yng Nghymru yn hwyluso ystod eang o wydweithiau proffesiynol sy’n dod ag aelodau ynghyd i drafod materion polisi ac ymarfer. Maent yn hanfodol i’n gwaith gan eu bod yn ein cynorthwyo ni i ddeall y materion sydd o bryder i ystod o sefydliadau ledled y sector plant. Drwy’r  rhwydweithiau hyn, fe allwn hysbysu aelodau o ddatblygiadau newydd, rhannu ymarfer da a datblygu safbwyntiau priodol yn ymwneud â datblygiadau polisi.

Ymgyrchoedd - Mae Plant yng Nghymru yn gysylltiedig â chydlynu amryw o ymgyrchoedd penodol ar faterion sydd o bryder i’r sector gwirfoddol. Mae’r rhain yn cynnwys ‘Sdim Curo Plant!/Children are Unbeatable!Cymru, sy’n lobïo yng Nghymru i newid y gyfraith fel bod gan blant yr un amddiffyniad rhag ymosodiad ag sydd gan oedolion, a Rhwydwaith Dileu Tlodi Plant Cymru, sy’n glymblaid o sefydliadau sy’n pryderu am dlodi ymysg plant.

Ymgynghoriadau ac Ymchwiliadau - Un o brif swyddogaethau Plant yng Nghymru yw trosglwyddo barn ei aelodau i lunwyr polisi. ‘Rydym yn ymateb i ystod eang o ymgynghoriadau ac yn darparu tystiolaeth i amrywiol bwyllgorau ac ymchwiliadau o eiddo Cynulliad Cenedlaethol Cymru. I wneud hyn, ‘rydym yn cysylltu gyda’n haelodau, fforymau a rhwydweithiau i sicrhau bod ein hymatebion i ymgynghoriadau yn amlygu’r holl faterion perthnasol ar gyfer y sawl sy’n gweithio yn y maes.

Cyngor Partneriaeth y Trydydd Sector- Mae Plant yng Nghymru yn cynrychioli sector gwirfoddol y plant ar Gyngor Partneriaeth y Trydydd Sector. Mae hyn yn golygu mynd â barn y sawl sy’n gweithio yn sector gwirfoddol y plant i gyfarfodydd Cyngor Partneriaeth y Trydydd Sector ac i gyfarfodydd a drefnwyd gyda Gweinidogion unigol.

Grwpiau Trawsbleidiol – Mae Plant yng Nghymru yn gwasanaethu’r Grŵp Trawsbleidiol ar Blant yng Nghynulliad Cenedlaethol Cymru a’r Grŵp Seneddol Hollbleidiol ar gyfer Plant yng Nghymru yn San Steffan. Mae’r grwpiau hyn yn galluogi Aelodau’r Cynulliad ac Aelodau Seneddol Cymreig, yn ôl eu trefn i ddod ynghyd yn rheolaidd i drafod materion o bryder i blant a phobl ifanc yng Nghymru.