Mae Leighton Andrews, y Gweinidog dros Addysg, wedi cyhoeddi pecyn cyllid gwerth £4 miliwn ar gyfer hyfforddi ymarferwyr cyfrwng Cymraeg yn y blynyddoedd cynnar.
Bydd yr arian newydd yn cael ei ddefnyddio i helpu i roi Cyfnod Sylfaen ar waith a bydd yn rhedeg tan fis Mawrth 2013.
Sefydliad Cam wrth Gam fydd yn darparu’r hyfforddiant, sy’n gweithredu o dan ymbarél Mudiad Ysgolion Meithrin a Geiriau Bach, rhan o Goleg Prifysgol y Drindod. Mae Cam wrth Gam yn darparu seilwaith cynhwysfawr o gefnogaeth genedlaethol i ymarferwyr cyfrwng Cymraeg yn y blynyddoedd cynnar, sydd wedi’i seilio ar fodel dysgu seiliedig ar waith. Mae Geiriau Bach yn canolbwyntio ar wella sgiliau Cymraeg ymarferwyr yn y blynyddoedd cynnar.
Mae rhagor o wybodaeth ar gael ar wefan Llywodraeth Cynulliad Cymru.