Mae Llywodraeth Cynulliad Cymru wedi cyhoeddi strategaeth integredig 6 blynedd ar gyfer mynd i'r afael â phob math o drais yn erbyn menywod a cham-drin domestig.

Bydd y strategaeth a’r cynllun gweithredu integredig newydd yn mynd i’r afael â phob math o drais yn erbyn menywod yng Nghymru, gan gynnwys treisio ac ymosodiadau rhywiol, cam-drin domestig, trosedd er anrhydedd, llurgunio organau rhywiol a phriodasau dan orfod.

Mae’r strategaeth yn cynnwys llawer o fentrau a bydd arian ychwanegol gwerth £1 miliwn ar gael i gyflwyno’r rhain. Felly, bydd cyfanswm y gyllideb yn £4.4 miliwn ar gyfer 2010. Ymhlith y blaenoriaethau allweddol mae:

• Ymestyn y gwasanaethau sy’n cael eu cynnig gan linell gymorth Cam-drin Domestig Cymru, i helpu unigolion sy’n cael eu cam-drin yn rhywiol hefyd
• Sefydlu prosiect newydd i fynd i’r afael â phuteindra a masnachu mewn pobl yng Ngogledd Cymru
• Cynyddu’r arian sydd ar gael er mwyn rhoi cymorth i Ganolfannau Galw i Mewn yng Nghymru
• Datblygu strategaeth hyfforddiant genedlaethol i sicrhau bod pobl broffesiynol ym mhob sector yn adnabod trais yn erbyn menywod, ac yn gwybod sut i fynd i’r afael ag ef, a’r effaith bosibl ar blant
• Parhau i ariannu ymgyrchoedd cyhoeddusrwydd sy’n canolbwyntio ar fynd i’r afael â safbwyntiau
• Ymgynghori ar gynnwys rhai materion sy’n gysylltiedig â thrais yn erbyn menywod yn y Fframwaith Addysgu Bersonol a Chymdeithasol
• Rhoi mwy o ffocws ar briodasau o dan orfod, trosedd er anrhydedd a llurgunio organau rhywiol menywod, gan ymestyn rhaglenni addysg presennol, a rhoi cyhoeddusrwydd i’r materion hynny
• Darparu hyfforddiant ariannol i aelodau allweddol o staff sy’n gweithio mewn llochesi a chynghorwyr cam-drin domestig annibynnol, i’w galluogi i gynnig cyngor ariannol gwerthfawr i ddioddefwyr
• Gweithio gyda NUS Cymru i ddatblygu ymgyrch aml-gyfryngol ar ddiogelwch personol i fyfyrwyr ar y campws
• Gweithio gyda Heddlu Trafnidiaeth Prydain i wella diogelwch i fenywod ar drenau ac mewn gorsafoedd rheilffordd.

Fe ellir lawrlwytho’r strategaeth oddi ar wefan Llywodraeth Cynulliad Cymru.