Mae Plant yng Nghymru wedi datblygu cyfres o adnoddau hyfforddi, i hyfforddi gweithwyr proffesiynol am Gonfensiwn y Cenhedloedd Unedig ar Hawliau’r Plentyn. Cafodd y gwaith ei gomisiynu gan Lywodraeth Cymru a’i ariannu drwy Raglen Cyrraedd y Nod Cronfa Gymdeithasol Ewrop.

Mae’r hyfforddiant a’r adnoddau wedi cael eu datblygu i helpu i sicrhau bod gweithwyr proffesiynol allweddol ledled Cymru, sy’n gweithio gyda phlant a phobl ifanc, yn ymwybodol o egwyddorion y Confensiwn ac yn eu deall. Mae’r hyfforddiant yn helpu gweithwyr proffesiynol i gefnogi plant a phobl ifanc i fanteisio ar eu hawliau ym mhob sefyllfa. Mae hefyd yn eu galluogi i gymhwyso eu gwybodaeth a’u dealltwriaeth o hawliau plant drwy eu hymarfer ac i nodi ffynonellau cefnogaeth wrth wireddu hawliau plant.

Anelir yr hyfforddiant yn arbennig at weithwyr proffesiynol sy’n gweithio ym meysydd:

·         Addysg

·         Gwaith Cymdeithasol

·         Iechyd

·         Yr Heddlu a’r Gyfraith

·         Cyfiawnder Ieuenctid

Mae’r hyfforddiant yn cynnwys:

·         Cyflwyniad i  Gonfensiwn y Cenhedloedd Unedig ar Hawliau’r Plentyn. Cwrs hanner diwrnod nad yw’n benodol i un sector  yw hwn, yn addas ar gyfer amrediad o weithwyr proffesiynol sy’n gweithio yn y sector cyhoeddus a gwirfoddol. Gall gael ei ddefnyddio’n gwrs arunig  neu wedi ei ddilyn gan naill ai:

• Hyfforddiant cyn-gymhwyso - hyfforddiant hanner diwrnod sy’n cynnwys modiwlau sector penodol, ond sy’n briodol i’r sawl sydd heb ennill eu cymhwyster proffesiynol eto, neu

• Hyfforddiant ôl-gymhwyso - hyfforddiant hanner diwrnod sy’n cynnwys modiwlau sector penodol, sy’n trafod materion ymarfer sy’n berthnasol i staff sydd newydd gymhwyso a’r sawl â phrofiad helaeth.

Mae’r sesiynau hyfforddiant cyn ac ar ôl cymhwyso wedi cael eu haddasu er mwyn i’r enghreifftiau ymarfer a’r astudiaethau achos a ddarperir ynddynt yn berthnasol i sectorau gwahanol

Mae modd lawrlwytho’r deunyddiau o wefan Lets Get it Right y Confensiwn

http://www.uncrcletsgetitright.co.uk/resourceslanding.aspx

Mae Plant yng Nghymru yn darparu hyfforddiant wedi ei gomisiynu ar Hawliau Plant, a gall ddarparu sesiynau hyfforddiant i  weithwyr proffesiynol mewn amrywiaeth  eang o gyd-destunau.  Am ragor o wybodaeth cysylltwch â: Claire Sharp, Swyddog Hyfforddiant yn Plant yng Nghymru, E-bost: claire.sharp@childreninwales.org.uk